La ĉeftemoj de HADES

Ses mil lingvoj, tio estas ses mil kulturoj kaj penssistemoj malsamaj. Dek miliardoj da individuoj, tio estas dek miliardoj da manieroj kompreni la aferojn, pensi, labori aŭ vivi en socio. Malkovrindaj ili restas.

La revuo HADES, ĝuste rilate tion, ambicias malkovrigi kulturojn kaj vidpunktojn neatenditajn. Por tio, ĝi iras renkonte al viroj kaj virinoj el ĉiaj landoj, kaj lasas ilin esprimiĝi pri difinita temo. Ĉar, ĉu temas pri si mem, pri politiko, pri laboro, pri ekonomio aŭ naturprotektado, nenio same fariĝas aŭ konceptiĝas: ĉina studento, demandita pri la eŭropa konstitucio, ne samparolos, kiel lia hungara kolego; li alportos prilumon novan, originalan, pri temo eble tro pritraktita.

Kvin temoj por alrigardi la mondon

HADES traktos pri transnaciaj temoj, interesantaj iun ajn sendepende de nacieco. Pli precize, HADES interesiĝos pri kvin problemaroj, universalaj aŭ supozataj tiaj. Nia celo? Esplori la rilatojn de la homo kun liaj ĉirkaŭmedioj: la naturo, la laboro, la povo, la ekonomia mondo kaj individuoj mem.

• La homo kaj la naturo. La homo, kvankam nur evoluinta besto, disponas pri povoj super la naturo, kiujn besto ne posedas. Povoj kvazaŭ prometeaj, kiuj al li ebligas remodli la naturon laŭ sia plaĉo. Tiuj povoj, senĉese kreskantaj, naskas novajn demandojn, almenaŭ en la okcidenta mondo. Kaj sekve sin demandas la homo pri la negativa influo de siaj agoj, epoke de la bioteknikoj kaj de la tutmonda varmiĝo. Ĉu ankaŭ aliloke? Kiel la individuoj kaj popoloj, tra la mondo, interagas kun naturo? Ĉu ĝin ili idolkultas? Ĉu ĝin ili industriigas? Ĉu ĝin ili enkaĝigas?
• La homo kaj la povo. La homa besto estas eminente socia, eĉ politika, diris Aristotelo. Besto, kies liberecoj estas regataj kaj enkadrataj de la reguloj de kolektivumoj, al kiuj li apartenas: socio, familio, saminteres-grupoj... Samnombraj komunumoj, pli-malpli ampleksaj kaj leĝprovizitaj. Kiel tiuj socivivaj reguloj estas dekretitaj, kiel al ili reagas la individuo, kiel li kompromisas kun leĝoj ne ĉiam akordiĝeblaj, kiam, ekzemple, tradicio kontraŭas oficialan leĝon? Certe ja, la libereco de iuj finiĝas tie, kie komenciĝas tiu de aliaj. Sed distingi, kie situas la limo ne pli facilas... Sen paroli pri la limo inter socio kaj individuo...

• La homo kaj la ekonomio. La homo interŝanĝas posedaĵojn kaj servojn kun aliaj, krom se li elektis aŭtarcion. Kiel okazas tiuj ekonomiaj interŝanĝoj? Kiuj formojn ili alprenas tra la mondo kaj Historio? Senmona interŝanĝo? Kontraŭ monpago? Interŝanĝo sen kompensaĵo aŭ rabatako? Kiuj interŝanĝaj metodoj kunekzitas, nuntempe, en mondo kie transnaciaj entreprenoj ĉeas kooperativajn entreprenojn aŭ individuajn mikro-entreprenojn kaj -aliloke- endanĝerigas la vivtenan agrikulturon?
• La homo kaj la laboro. Socia besto, la homo estas ankaŭ aktiva besto: de matene ĝis vespere, de la naskiĝo ĝis forpaso, li okupas siajn manojn kaj menson. Kaj tiel li trovas, se eblas, sian lokon en la socio. Kiel tiu aktiveco gravega, kvazaŭ neevitebla, estas travivata ĉi tie kaj aliloke? Kiel individuo perceptas ĝin? Kiel la socioj administras ĝin?
• La homo kaj li mem. Kaj se, en tiu socia estaĵo, kaŝiĝus nesuperebla soleco? La homo, dum sia tuta vivo, ĉiam ajn povos percepti la mondon nur per siaj propraj sensoj, tra siaj propraj referenc-skemoj. Tiu mondo estas lia mondo. HADES, pri ĉi tio, videbligos la unikecon de ĉies perceptoj fronte al la mondo.

Kvin ĉirkaŭmedioj, kvin temoj, kvin problemaroj... Ĉiu temo de HADES rilatas al unu el la mondoj ĉirkaŭantaj la homon: la naturmedio laŭvorte, la politika kampo, la ekonomia sfero, la labor-mondo kaj la homo mem. La homoj, ĉar ili ĉiuj rilatas kun tiuj mondoj, frontas similajn problemojn. Do tiel esplorante tiuj problemojn spitantajn la landlimojn, HADES iras renkonte al la homoj kaj popoloj. Tiuj ĉi havos ion por komprenigi al ni, ĉar iliaj problemaroj estas niaj, krom pri la propra ĉirkaŭmedio.